言之無物 (從五區公投到政改之後．七一之前)

立法會通過政改方案

本來
已經冇咩好講 亦冇咩想講

無謂 言之無物

但尋日城市論壇
有人要求民主黨唔好出席七一遊行
卿姐以一句: "乜個遊行係你ge咩?" 來回應

我思考左好耐
最後決定 blog 呢篇 entry

政治場上

冇永遠ge敵人
冇永遠ge堅持
冇永遠ge承諾

只有永遠ge利益

呢一點 陳腔 濫調
但偏偏有人就係未睇通睇透

少一點頭腦
少一點獨立分析ge能力

好 危險



先由五區公投講起

社民連未同泛民溝通好
就提出五區總辭呢個idea
並明言無論其他泛民黨派跟唔跟 都會照去馬

跟 等於認社民連做呀頭
唔跟 等於左傾

於是 民主黨同公民黨有兩種唔同反應

民主黨響議會算係大黨
並且係香港民主先軀
在情在理 冇理由傲認你社民連做呀頭
而且 佢地有返咁上下歷史
支持者都有返咁上下年紀
自然唔再係差人逼到埋來死就死果班 "激進份子"
如果佢地跟埋社民連 "激鬥"
先至係對唔住選民 對唔住選票
反之 按兵不動 可以保留談判籌碼
計落 梗係唔跟你社民連玩

至於公民黨
歷史短 支持者唔夠民主黨穩固
亦冇可能好似民建聯咁有中央撐
律師背景 理應target中產選民 走溫和路線
但自由黨有版比佢地睇
立場搖擺 "懶理性 假溫和"
會令佢地響08年立會選舉pk得好慘
於是 真心覺得抗爭有用也好
逼於無奈要 "立場鮮明" 也好
佢地 只可以跟

一跟
好 "成功"
甚至搶埋社民連風頭
變成五區公投召集人
上埋電視同特首辯論

唔好理主流傳媒同特區政府點樣評價公投數字
佢地立場鮮明ge目的已經達到左

然後 民主黨轉肽撐政改
係真心覺得改良方案增加左民主元素也好
定係唔想比公社搶曬功勞都好
同公社兩黨壁壘分明 keep住溫和民主票源呢個目的 都達到左

值得一提ge係鄭家富
不強黨所難 不強佢所難
佢有ge係地區工作根基
以往民主黨拉票同出選策略等等
都係鄭ge強項
離開民主黨
對佢 有利 冇害
而涂僅申就冇佢咁夠薑

你地話中央係度為分化到泛民而陰笑咩?

講到尾

其實各取所需

邊個贏 邊個輸 要等兩年後先知


回歸正題 咩叫言之無物
我呢篇愚見可能係 "陰謀論" 或者 "言之無物"...
因為我唔係讀政治 才疏學淺 分析力有限

"靚模唔識分掃地呢個職業係咪高尚" 係言之無物..
因為佢concept上分唔到 high/low

果位唔知邊個黨派ge支持者叫民主黨唔好出席七一遊行... 更加係言之無物

連政府/警方甚至中央都唔夠膽阻止ge七一遊行

一個聲稱為民主抗爭ge人 竟然講得出叫人地唔好去遊行

佢係 concept上分唔到咩叫極權 咩叫民主

一日未搬 一日都撐你

前兩日同朋友爭論

朋友問我又插政府又插泛民咁仲插剩邊個

我插剩呢個...

我響九龍東返工
九龍西返學
放假行港島
住新界西

我唔睇電視
但響電視見得最多GE係社民連

但落到街見得最多GE係佢...

佢唔支持民主黨改良政改方案

佢用自己GE一票實實在在去反對

但佢唔會鬧民主黨出賣民主


何俊仁我唔知
但司徒華78歲生CANCER都去六四集會
點樣出賣民主

妥協 係唔妥
但如果妥協就係出賣民主
未免言重左

民主黨唔DESERVE呢個指控

痛心疾首呢四個字

佢留比六四

馬草泥高呼緊 "你民主黨已經唔再係我地泛民GE一員" GE時候

佢 爭取緊最低工資 最高工時

要爭 佢論資排輩數支持者都爭贏社民連同馬草泥

但佢冇爭


佢冇為自己政治地位諗
佢時時刻刻 為緊打工仔諗


李卓人
佢唔係政治家 佢做實事 佢安靜
但冇人夠膽話佢只關心民生唔關心民主

新界西GE朋友

2012 希望你地識揀

我一日未搬
一日都會繼續投票比佢